मत दिले पुढे काय !

या वर्षी प्रत्येक मतदात्याने आपला मतदानाचा हक्क दोन वेळा बजावला,एकदा लोकसभेसाठी आणि आता विधानसभेसाठी,खरच का हो तुमच्या मताला किंमत आहे? जर तुमचे मत अमोल आहे अनमोल आहे तर नक्की चुकत कुठे?तुम्हाला तुमचा योग्य, लायक प्रतिनिधी का बर निवडता येत नाही?कि तुमच्या समोर पर्यायच उपलब्ध नसतो? मला वाटत जर स्वतःच प्रामाणिक मत मांडता आल तर तुम्ही नक्कीच अस म्हणाल कि ज्याला आमचा पर्तिनिधी म्हणता येईल,ज्याच्या जवळ विश्वासान आमच्या विभागाच्या,पर्यायानं जिल्हा किंवा राज्याच्या चाव्या, राज्यकारभार सोपवता येईल असा गुणवान उमेदवार पक्ष देत नाहीत.पक्षाला हवा असतो असा चेहरा जो पक्षासाठी निधी उभा करू शकेल आणि गरज भासल्यास शक्तीचा प्रयोग करू शकेल.
उपलब्ध पर्यायातून आपला प्रतिनिधी निवडायचा म्हणजे तारेवरची कसरतच.अर्थात हाच उमेदवार का देता? त्याची पात्रता काय? हे पक्षाला विचारण्याचे साहस कुणी करत नाही,त्याला ह्या लोकशाही पेक्षा स्वतःचा जीव प्यारा असतो.नाहीतरी लष्कराच्या भाकऱ्या बडवून मिळणार काय?म्हणुन कोणिही उमेदवाराच्या पात्रतेवर आक्षेप घेत नाही.त्या पेक्षा वाटल तर मत द्यायला गेल नाही तर पिकनिकला गेल. उगाचच शहाणपणा कराच कशाला?असो, मतदानाचा हक्क बजावून झाला.आता शिळोप्याच्या गप्पांना ऊत येईल. कोणी किती पैसे खर्च केले? कोणाच्या किती नोटा जप्त झाल्या. मला खरच कळत नाही. ह्या नोटांची बंडल नक्की कुठ मिळतात? च्यायला आम्ही बाजारात गेलो तर दहा रुपयाची कोथिंबीर आठ रुपयांना मागणार त्यासाठी घासाघीस करणार समोरच्या भैयाचे किंवा त्या बाईचे दोन शब्द ऐकून घेणार पण एक रुपया कमी कसा केला त्याचा किस्सा बायकोला ऐकवणार.ह्या नेत्यांना एव्हढा पैसा देते कोण?कशासाठी ? खरच धन्य आहे सर्व पक्षाची ! ! ! त्यांच्या उमेद्वारंची आणि त्यांच्या पैसे खर्च करण्याच्या ऐपतिचि. मला सांगा कोण असा मायचा लाल आहे जो स्वतःचे पैसे उधळून निवडून येईल आणि निस्वार्थीपणे जनतेची सेवा करेल? ह्याचा अर्थ स्पष्ट आहे कोणिही सेवाव्रत म्हणुन राजकारणात येत नाही. आता राजकारण हा धंदा झाला आहे आज पैसे फेका आणि पुढील पाच वर्षात पन्नास पट वसूल करा. कोणताही पक्ष चुकूनही अन स्वप्नातही स्वच्छ कारभाराची हमी देवू शकणार नाही.
आता शेंबूड फुसणाऱ्या मुलाला देखील कळते, काही तरी गमावल्या शिवाय काही तरी मिळत नाही.म्हणूनच नागरिक म्हणुन आपली जबाबदारी वाढली आहे.थोड्याच दिवसात सरकार स्थापन होईल.भाजपा ? युती ! की आघाडी कि अजून वेगळ प्रयोग हे ठरायच असल तरी कोणीतरी अन कोणाल तरी सोबत घेतल्या शिवाय सरकार बनत नाही हे नक्की म्हणुन आपली जबादारी वाढली आहे. तुम्ही म्हणाल माझ्या हाती काय आहे? जर डोळे उघडे ठेवून वागायचं अन जगायचं ठरवल तर बरच काही आहे. तुमच्या प्रभागातला रस्ता जेव्हा केला जातो त्याच काम योग्य होत कि नाही हे जर तुम्ही पाहिलात,तुमच्या नगरात होणारी गटाराच बांधकाम योग्य होत आहे कि नाही हे पाहिलात अन तुमच्या प्रभागात टाकली जाणारी जलवाहिनी चांगल्या दर्जाची आहे कि नाही योग्य प्रकारे टाकली जाते आहे कि नाही हे तुम्ही पाहिलात तर पंचवीस टक्के काम झालाच म्हणुन समजा.
प्रभागातल्या प्रत्येक कामावर तुमचा, तुमच्या मित्र मंडळींचा बारीक डोळा असेल तर कोणिही कसेही काम करायला धजावणार नाही मात्र मला, ते काम माझे आहे ही जाणिव होणे गरजेचे आहे. मला काय त्याचे? ही उदासीनता जर नसेल तर नक्कीच तुम्ही बदल घडवू शकाल हा विश्वास मला आहे. गरज आहे ती स्वतःतल्या नागरिकाला त्याच्या हक्कपेक्षा कर्तव्याची जाणीव होण्याची.केवळ एक दिवस घरी थांबून किंवा मत देवून काय होणार आहे? त्या पेक्षा तुमच्या नगरातल्या नगर सेवकावर लक्ष ठेवा, त्याच्याशी संवाद साधा तुमच्या नगरच्या गरजा विषयी त्याच्याशी बोला.नक्कीच बदल घडेल.
भ्रष्ट कारभार चालतो कारण आपलीच उदासीनता, मला काय त्याचे हि वृत्ती.केवळ तुम्ही मनाशी ठरवलंत तर नक्कीच काही प्रमाणात ह्या भ्रष्ट कारभारावर अंकुश ठेवता येईल.ग्रामीण भागात आजही पैशांवर चुकलच गांधी नोटेवर निवडणुक लढवली जाते.भाबड्या ग्रामीण जनतेला दोन दिवसाचा बाजार करण्या एव्हढे रुपये मिळाले तरी त्यांचा म्होरक्या सांगेल त्या निशाणीच बटन दाबून ते मोकळे होतात.ग्रामीण जनता अजाण आहे किंवा कशाच्या तरी लोभापायी तस करते पण आपण शहरवासी सुशिक्षित आहोत पण तरिही मताचा हक्क नव्हे कर्तव्य आपण का बजावत नाही?आपल्या माथी अयोग्य उमेदवार मारला जाऊ नये म्हणुन का जागरूक राहात नाही? मी काहिही करणार नाही,माझी प्रतिक्रिया कृतीतून व्यक्त करणार नाही केवळ दुसऱ्याला दोष देत राहीन हे योग्य आहे का ? मोदींना काय अभिप्रेत आहे ह्याची भरपूर चर्चा होते का? तर ते पंतप्रधान आहेत म्हणुन ! तुम्ही तुमचे घर कसे असावे कसे दिसावे या विषयी जागरूक असता ना?ताटात वाढलेलं निमूट खाता कि त्या विषयी आपल मत व्यक्त करता? काय पदार्थ ताटात असते तर बर झालं असत अस तुम्हाल वाटते?
ह्या साठी जसा तुम्ही सोयीन विचार करता तसा तुमच्या इमारती बद्दल,गावाबद्दल करता का? जेव्हा माझी इमारत मला स्वच्छ हवी असे वाटेल,जेव्हा माझ्या ऑफिसातील वीज वाया जावू नये असे मला वाटेल, जेव्हावाया जाणारे पाणी पाहून माझे मन हळहळेल ते पाणी वाचवावे ह्या साठी धडपड करेल तेव्हा माझ्या विचारांची झेप माझ्या पुरती सीमित राहणारच नाही. मित्रहो केवळ मताचा हक्क बजावून चालणार नाही ज्या गोष्टीसाठी,चांगल्या प्रशासना करिता तुम्ही मत दिलत,आता तुमचा प्रतिनिधी तुमच्या साठी,समाजासाठी चांगला कारभार करतो कि नाही हे पाहणे तुमची जबाबदारी आहे.मत तर दिलेत मताने उमेदवार निवडूनही येईलच पण तुमचे चांगले विचार त्याच्यावर लादल्या शिवाय त्याच्याकडून चांगल्या प्रशासनाची अपेक्षा बाळगू नका.चला तर आम्ही मत अकारण वाया घालवणार नाही आमच्या मताचा आदर राखला जाईल ह्या साठी स्वतःत बदल घडवू ,दुसऱ्यास बदलायला भाग पडू आमच्या मताची किंमत समाजासाठी पुरती वसूल करू